Dictionnaire de psychanalyse

Rizh neuroz digemmet gant Freud diouzh ar psikoneurozioù evel-henn :

a) Orin an neurozioù bremanek n’emañ ket e kenniñvoù ar bugelvezh, hogen er bremañ.

b) An azonoù n’int ket un eztaol argelel ha dreistdesavelet, hogen un disoc’h diouzh an ezvezañs pe an digevazasted eus ar boziadur revel.

Freud a renkas da gentañ an neuroz enkrez hag an neurasteniezh e stern an neurozioù bremanek, ha da c’houde e fellas dezhañ degas ivez an hipokondriezh.

Freud a glaske digemmañ an neurozioù bremanek diouzh ar psikoneurozioù. Gant ar re-se, “emañ er greudelezh andon ar broud, elfenn-delankañ ar strafuilh, tra m’emañ er vredelezh gant an darfell hag an neuroz mac’hennel”. En neuroz enkrez e ve an delanker un andiskarg eus ar broud revel, en neurasteniezh un diskarg ankevazas anezhañ. Koulskoude ne wele ket enebadurioù hepken etre an daou rumm anaezioù ; meur a wech e strivas da verkañ kenglotadurioù, termen ouzh termen, etre, diouzh un tu, an neurasteniezh hag an neuroz enkrez ha, diouzh an tu all, an neurozioù treuzdoug diseurt ; heñveldra, diwezhatoc’h, pa zegasas an hipokondriezh, e roas dezhi da geveleb ar parafreniezhoù pe psikoneurozioù narkisek (skizofreniezh ha paranoia). Seurt kenglotadurioù zo kantreizhet n’eo ket hepken dre berzh heñveliezhoù luniadur, hogen dre ma’z “a alies-tre azon an neuroz bremanek d’ober kraonell ha pazenn diaraoger an azon psikoneurozel”.

Hiziv ez eo hogos dilezet keal an neuroz bremanek.